A Pobra avanza no proceso depurativo das augas

Coincidindo co inicio do novo contrato para continuar coa xestión autonómica da depuradora municipal da Pobra do Caramiñal, na xornada de onte efectuouse unha visita a estas instalacións. A conselleira de Infraestruturas e Mobilidade, Ethel Vázquez, destacou o investimento da Xunta de 1’7 millóns de euros para a xestión desta planta nos próximos dous anos empregando sistemas de intelixencia artificial.

Indicou que o novo contrato de conservación e mantemento da depuradora municipal, funcións que vén asumindo Augas de Galicia dende o 2005, abrangue tódolos traballos de explotación e conservación das instalacións que forman parte do sistema de depuración para que cumpran os cometidos para os que foron deseñadas, en condicións óptimas de funcionamento. Así mesmo, explicou que se recollen diversas intervencións, coa renovación de determinados equipos, e melloras de calidade e control na prestación do servizo.

Anunciou, ademais, a mellora do sistema de saneamento e depuración, dotando a depuradora dun novo sistema terciario que optimiza e incrementa as posibilidades de tratamento. Supón a substitución do equipo de desinfección de raios UV e implantarase tamén un sistema de monitorización enerxética, polo que a auga expulsarase ao mar nunhas mellores condicións dende o punto de vista microbiolóxico. Cómpre indicar que, durante os primeiros anos dende a posta en marcha da EDAR, producíanse vertidos industriais á rede que facían que a auga chegase turbia e cunha concentración de sólidos que redundaba en que a eficacia do sistema de desinfección UV instalado fose practicamente nula, ademais de danar a integridade do equipo. Actualmente, a progresiva redución dos vertidos industriais e as melloras introducidas na planta a comezos da década pasada por parte de Augas de Galicia, tradúcese en que a calidade do efluente cumpre os requisitos mínimos necesarios para que o equipo UV garanta a desinfección. A previsión é licitar as obras neste mes de febreiro, unha vez se conte coa aprobación por parte do Concello, cun investimento de máis de 205.000 euros por parte da Administración autonómica. A actuación será cofinanciada con fondos FEDER 2014-2020.

Pola súa parte, o alcalde da Pobra do Caramiñal, Xosé Lois Piñeiro (Nós Pobra), expresou o seu agradecemento á Xunta e manifestou que este é un paso máis na mellora do proceso depurativo. A este respecto, referiuse a que o Concello leva a cabo unha inspección exhaustiva no control de vertidos. Lembrou tamén que recentemente se procedeu coa reparación do emisario submarino situado fronte o antigo convento de Santo Antonio e, unha vez efectuado o seguimento, constatouse que está funcionando correctamente. Do mesmo xeito, apuntou que a Administración local segue ampliando a rede de saneamento. Neste senso, avanzou que se acaba de licitar un proxecto a este respecto no Campiño por un orzamento inicial entorno aos 100.000 euros. O mandatario local declarou, ademais, que está pendente o inicio de proxectos da rede separativa de pluviais e saneamento para contribuír a que o funcionamento da instalación hidráulica “sexa o máis efectivo posible.”