O campus de voluntariado de Amicos afianza a súa aposta pola inclusión e o coidado medioambiental
A praia da Corna foi a paraxe elixida por Amicos para desenvolver un encontro no que dar a coñece-las actividades medioambientais desenvolvidas dende comezos de xullo e que concluirán no día 15 ao abeiro da súa participación por terceiro ano consecutivo no campus de voluntariado ambiental inclusivo da Consellería de Política Social e Xuventude da Xunta de Galicia baixo o lema O verán que queres contar.
Precisamente, en representación da Administración autonómica, Cristina Pichel, directora xeral de Xuventude, Participación e Voluntariado, indicou que neste campus conflúen a conservación medioambiental, a inclusión e a convivencia ao tempo que se resaltan os recursos patrimoniais naturais “de primeiro nivel” de Galicia. Nesta mesma liña tamén se expresou a directora xeral de Patrimonio Natural, Belén María do Campo, quen agradeceu esta serie de accións que contribúen a “poñer en valor os nosos espazos naturais.”
Pola súa parte, a concelleira do Medio Ambiente da Pobra do Caramiñal, Genoveva Hermo (Nós Pobra), trasladou o seu desexo de que esta iniciativa teña continuidade pois cualificouna como “moi positiva para toda a sociedade e o medio ambiente”, cuestión á que tamén se referiu a primeira tenencia da alcaldía de Ribeira, María Sampedro, quen lle desexou ás persoas participantes “que desfrutedes, aprendades moito e transmitamos ao resto da sociedade esa conciencia de coida-lo noso medio ambiente.”
Este campus conta coa participación dun total de 14 persoas voluntarias, con idades comprendidas entre os 18 e 30 anos, procedentes tanto da propia comarca coma de distintos puntos da xeografía estatal que, en palabras do director xeral de Amicos, Xoán España, “fan un traballo espectacular” nesta experiencia de alto valor engadido que tivo como actividades principais a eliminación de especies invasoras, a limpeza de praias e a instalación dun hotel de insectos.
A este respecto, unha das voluntarias, Adriana Miguéns, residente no Fogar Amicos, amosouse entusiasta pola súa participación por primeira vez neste campus de voluntariado do que está sacando moitas cousas positivas ao igual que Silvia González, voluntaria chegada dende Madrid.
A xornada rematou coa entrega dos diplomas despois de tomar parte dunha proposta de sensibilización ambiental a través do xogo RE-MAR e de coñecer de primeira man os residuos habituais que se atopan nas contornas marítimas.
Imaxe cedida por Amicos
Imaxe cedida por Amicos
