A Pobra une educación e cultura nas XXIV Xornadas de Homenaxe a Valle-Inclán
A Pobra do Caramiñal inicia a estación outonal cun dos seus pratos fortes culturais: as Xornadas de Homenaxe a Valle-Inclán na súa vixésimo cuarta edición. Case un cuarto de século de forma ininterrompida, que se programa arredor do día 28 de outubro, data de conmemoración da súa nacenza. Como consecuencia, preséntase unha axenda heteroxénea que se condensa na última quincena do mes e que, se ben mantén o contido especializado, introduce propostas innovadoras e educativas, facendo especial fincapé nas novas xeracións para achegárlle-la vida e obra do escritor.
En palabras da concelleira da Cultura, Patricia Lojo (PSdeG-PSOE), “podemos afirmar que son un evento máis que asentado no calendario cultural galego. Isto motivounos a facer unha reflexión sobre o papel destas xornadas e do propio Museo que as organiza e acolle. Froito desa reflexión decidimos levar a cabo unha serie de cambios á hora de afronta-las deste ano. Son cambios de matiz, construídos sobre a estrutura que se viña repetindo ao longo de edicións anteriores e que nos pareceu adecuado actualizar lixeiramente.”
A este respecto tamén se referiu o alcalde, Xosé Lois Piñeiro (Nós Pobra), quen destacou a variedade de actividades para tódolos públicos, ademais de pór en valor as iniciativas levadas a cabo neste ano como, por exemplo, o concurso de carteis.
Ámbolos dous tiveron palabras de agradecemento para o director xeral da Cultura, Anxo M. Lorenzo, polo seu apoio público e económico ás xornadas ano tras ano, ademais de a Xaquín del Valle-Inclán Alsina polo depósito de fondos no Museo para a súa custodia, estudo e divulgación dos coñecementos.
Pola súa parte, a técnica do Museo, Araceli Abad, salientou que para estas xornadas se buscou estreitar máis a colaboración cos centros educativos, polo cal unha parte da materia se enfocou á rapazada que neles estuda.
A inauguración efectuarase no venres 14 coa apertura da exposición dos traballos presentados ao I Concurso de Carteis das XXIV Xornadas de Homenaxe a Valle-Inclán. Será ás 20.00 horas, no Museo Valle-Inclán. Deseguido, o foco trasladarase ao Auditorio, ás 20.30 horas, para a impartición da conferencia Valle-Inclán, un escritor de éxito? da man de Xaquín del Valle-Inclán Alsina. As persoas asistentes recibirán como agasallo a lámina gañadora do dito certame, da autoría de Sara Martínez Narváez. O apartado dos coloquios terá continuidade no venres 21, ás 20.30 horas, no Auditorio, con Josefina Blanco, unha actriz esquecida, a cargo de Xeila Iglesias.
Tamén haberá oco para a presentación da publicación de banda deseñada Valle-Inclán, los años del esperpento, de Manuel López Poy. Transcorrerá no sábado 15, ás 20.30 horas, no Auditorio.
O eido teatral volve adquirir gran peso nesta convocatoria, cunha énfase nos centros de ensino da localidade. MyH Producciones subirá ás táboas do Elma dobremente para interpretar Luces de bohemia de Ramón del Valle-Inclán. No domingo 16, ás 20.00 horas, estará aberto para o público adulto, mentres que no luns 17 será unha función exclusiva para estudantado do IES. Precisamente, alumnado do instituto desprazarase ao Museo no xoves 20 para presencia-la representación Valle-Inclán e ti, de Artes Estudio. O teatro regresará ás salas da institución museística no martes 25 e xoves 27 (dúas sesións por día) con Charo Pita e O avó e outras historias para contar?, destinado aos colexios da primaria. E, aberto á cidadanía en xeral, De Tal Cuento Tal Astilla levará De paxaros na cabeza ao Museo no venres 28, ás 20.30 horas.
Para as escolas infantís configúrase a actividade Pinta a Valle-Inclán, que se desenvolverá do día 18 de outubro ata o 2 de novembro e consistirá en colorear, debuxar ou aplicar calquera tipo de técnica plástica a unha silueta do intelectual impresa sobre papel.
Como colofón, no sábado 29 procederase no Cantón da Leña, a partir das 12.30 horas, coa tradicional ofrenda cívica onda o monumento de Valle-Inclán, que incluirá lectura pública de textos e estará amenizada pola Escola de Baile e Pandeireta Caramiñas da Asociación Amas de Casa. Haberá tamén ruada por espazos céntricos da vila coa música de Os Caraveiros.
Non se require a inscrición previa para ningunhas das accións culturais nomeadas.
