Un cuarto de século pondo en valor a figura e a obra de Valle-Inclán
Vinte e cinco anos de divulgación, vinte e cinco anos de valorización, vinte e cinco anos de literatura. As Xornadas de Homenaxe a Valle-Inclán fan un cuarto de século e, en consecuencia, presentan un amplo programa para desenvolver na última quincena do mes de outubro.
No acto de presentación participaron o alcalde, José Carlos Vidal; o director xeral da Cultura, Anxo M. Lorenzo; a concelleira da Cultura, Patricia Lojo; e o director do Museo Valle-Inclán, Antonio González.
O rexedor salienta o papel fundamental que xogan estas xornadas, por lles achegaren a tódolos públicos un intelectual da magnitude de Valle-Inclán, polo cal, se ben hai unha significativa presenza do contido especializado, tamén hai propostas de carácter lúdico. Todas elas “contribúen ao dinamismo cultural na época outonal, poñen A Pobra do Caramiñal no mapa da divulgación literaria e avivan o ronsel valleinclaniano.”
Precisamente, ao feito de lle achega-lo literato a toda a sociedade tamén se refire a edil, quen sinala que se volve apostar por introducir no cartel unha serie de actividades dirixidas á comunidade educativa nos distintos graos da ensinanza para que as novas xeracións de pobrenses poidan mergullarse no mundo valleinclaniano cun contido distendido e adaptado a cada rango de idade. “Na anterior edición funcionaron moi ben as accións coa rapazada, polo cal queremos repeti-la experiencia de implicarnos cos centros”, afirma.
A Xunta de Galicia continúa a apoiar esta programación, segundo reitera o representante da Administración autonómica, cun reforzo que tamén se traduce no incremento da subvención destinada para tal fin. Anxo M. Lorenzo fai fincapé na transcendencia destas xornadas dedicadas a “un dos escritores clásicos máis universais, xunto con Rosalía de Castro e Emilia Pardo Bazán”, ao cal tamén se lle poden engadir outros nomes galegos como Camilo José Cela.
Tamén ten palabras a este respecto o director da institución museística, quen apunta que “somos localidade valleinclaniana e traballar cun lévedo tan exquisito no ámbito galego, nacional e internacional é unha sorte.”
A inauguración desta convocatoria terá lugar no venres 13 coa conferencia É Valle-Inclán un autor galego? Do Rexionalismo ao teatro actual: variacións da recepción da súa obra na cultura galega, a cargo de Xaquín Núñez Sabarís, profesor da Universidade do Minho e escritor. O apartado dos relatorios continuará no venres 20 con Teresa Bretal Martínez, profesora do Conservatorio Superior de Música da Coruña e compositora, quen disertará sobre Como facer música da obra de Valle-Inclán: a ópera “Divinas palabras” de García Abril. Ambos serán ás 20.00 horas, no Auditorio do Museo Valle-Inclán.
No que respecta a exposicións, abrirase ao público 25 anos de cultura valleinclaniana na casa da cultura Raquel Fernández Soler, ás 20.00 horas do xoves 19. Trátase dunha fotocronoloxía elaborada con fondos do propio museo. Xa no sábado 28, ás 12.00 horas, estrearase na sala Iconografía Contemporánea da institución museística a mostra “Locus amoenus”. Obxectos persoais do escritor, da colección de Xaquín del Valle-Inclán Alsina.
As artes escénicas adquiren un especial cariz. Suso Martínez procederá, no sábado 14, a realiza-lo percorrido teatralizado Los blasones de Viana del Prior. Visita dramatizada en A Pobra por los mundos de Valle-Inclán. Establécese como punto de encontro O Cantón da Leña, ás 12.00 horas. O teatro cine Elma acollerá tres representacións, todas elas ás 19.30 horas: Tatana Teatro subirá ás táboas con Carita de plata no domingo 15, Cía. Sala Negra fará o propio con Esperpento no domingo 22 e será a quenda de Teatro en Punto con A miña irmá Antonia no domingo 29. Pola súa parte, o Grupo Ouriol (con Eva Veiga, Fito Ares e Bernardo Martínez) ofrecerá no sábado 21 o recital Claves líricas, que combina poesía, música e pintura. A acción focalizarase no Auditorio do Museo Valle-Inclán, ás 20.30 horas. E Quico Cadaval executará no venres 27 a performance Divinas palabras. Imaxes profanas, na lembranza de Manuel Ayaso. Realizarase no Elma, ás 20.00 horas.
Así mesmo, haberá oco para a presentación do libro La España Tradicional, de Ramón del Valle-Inclán; unha edición a cargo de Xaquín del Valle-Inclán Alsina que publica o Foro Galicia e Valle-Inclán. Esta cita literaria desenvolverase no sábado 21, ás 20.00 horas, no dito auditorio.
Xa cara ao remate das xornadas, no sábado 28 haberá un dos pratos fortes desta axenda cultural: o acto conmemorativo da nacenza de Valle-Inclán coa tradicional ofrenda cívica e o concerto da Banda de Música Ateneo Musical da Pobra do Caramiñal, no Cantón da Leña, ás 12.30 horas.
Con relación aos centros educativos, apóstase novamente por Pinta a Valle-Inclán, dirixido ás escolas infantís, a partir do martes 17. Consiste en aplicar calquera técnica plástica que consideren sobre ilustracións da autoría do artista Siro. Alumnado da primaria asistirá ao espectáculo de monicreques A cabeza do dragón, de Teatro Cachirulo. Os grupos dividiranse en dúas xornadas: mércores 25 e xoves 26, ambas no Elma, ás 11.30 horas. E, para o estudantado da secundaria, configúrase a función de narración oral Valle-Inclán, o “hipster” antigo: relatos de almas en pena, trasnos e ladróns, con Charo Pita e baseado na obra Jardín umbrío. Representaranse dúas sesións: no venres 27, ás 11.00 e ás 12.15 horas, no dito auditorio.
A ilustración da cartelaría deste ano foi realizada polo deseñador gráfico Óscar Louzán.
Ningunha das referidas actividades require a inscrición previa.
