Últimas Novas

A Pobra impartirá dous cursos relativos á aplicación de produtos fitosanitarios

A Pobra impartirá dous cursos relativos á aplicación de produtos fitosanitarios

12 Maio, 2022

A Concellaría do Desenvolvemento Local da Pobra do Caramiñal pon en marcha un novo itinerario formativo como mecanismo facilitador de cualificación laboral, así como de ferramentas para a adquisición de novas competencias que poidan redundar nunha mellora da empregabilidade no sector primario.

Nesta ocasión, focalizarase no eido fitosanitario e constará de dúas accións de balde solicitadas á Consellería do Medio Rural e que se desenvolverán na aula de estudo situada na planta superior da biblioteca municipal. Ámbolos módulos ofértanse de maneira conxunta e disponse dun límite de 20 prazas.

A concelleira do Desenvolvemento Local, Amparo Cerecedo (BNG), explicou que están destinados a todo o mundo en xeral, tanto a aquelas persoas que se dediquen ao mundo do agro coma a aquelas outras con inquedanzas nesta materia, pois “cremos na soberanía alimentaria e que o sector agrario é importantísimo no ámbito económico e onde se pode inserir laboralmente moita xente.” Manifestou, así mesmo, que esta formación se encamiña a unha agricultura baseada nunha perspectiva ecolóxica.

Respecto a isto último, a orientadora laboral do Concello, Blanca Álvarez, engadiu que “permite a obtención das competencias básicas para o manexo de produtos fitosanitarios imprescindibles para o control dos praguicidas, sempre cun uso sustentable e de xeito agroecolóxico.”

Do 13 ao 17 de xuño impartirase o nivel básico do curso de aplicador/a manipulador/a de produtos fitosanitarios. Transcorrerá en horario de 09.00 a 14.00 horas. No día 20 procederase co exame, o cal se traducirá, unha vez superado, no outorgamento do carné.

O outro afondará na normativa esixible en materia de sanidade e uso sustentable de produtos fitosanitarios na produción primaria agrícola. A data elixida é 28 de xuño, dende as 16.00 ata as 21.00 horas.

As persoas interesadas dispoñen dende o día 12 ata 19 de maio para se inscribiren a través do rexistro do Concello, tanto físico coma telemático, onde está á disposición o documento de solicitude. Ademais, incorporarase unha declaración de responsabilidade do cumprimento dos requisitos de participación e a copia do DNI. A selección farase pola orde de presentación.

Máis información no teléfono de contacto 981377610.