Últimas Novas

As futuras promesas da robótica reciben as medallas e trofeos da First Lego League Galicia

As futuras promesas da robótica reciben as medallas e trofeos da First Lego League Galicia

15 Xullo, 2021
Foto conxunta cos equipos de robótica

Foto conxunta cos equipos de robótica

Os equipos Robot City Pobra e Robot City Pobra Junior, ambos da ANPA Bandaseca, e Mega Builder Team, de Mega Ribeira, recibiron na tarde deste 14 de xullo as súas correspondentes medallas, ademais dun trofeo e diploma por grupo, logo dos recoñecementos acadados na sétima edición da First Lego League Galicia, impulsada pola Universidade da Coruña, a cal contou coa participación dun total de 250 mozos e mozas de 34 equipos de toda Galicia que defenderon os seus correspondentes proxectos de robótica. Unha convocatoria que se tivo que celebrar seguindo o formato telemático e que contou coa colaboración do Concello da Pobra do Caramiñal para a retransmisión dos referidos equipos. O alcalde, Xosé Lois Piñeiro (Nós Pobra); a concelleira da Educación, Genoveva Hermo (Nós Pobra); e o coordinador da FLL Galicia, o profesor da UDC, José Antonio Becerra Permuy, foron os encargados de efectua-la entrega, felicitando aos rapaces e destacando a calidade dos seus traballos. No acto tamén estiveron presentes a presidenta da ANPA Bandaseca, María José Rego, e o profesor que axudou a elaborar tódalas iniciativas, Alberto Cascallar, da academia MEGA Ribeira.

Robot City Pobra

Robot City Pobra

O Robot City Pobra logrou o Premio Deputación da Coruña aos Valores FIRST, cun traballo sobre diabetes e actividade física. A elección desta temática motivouna o feito de que un dos integrantes ten diabetes tipo 1, e no confinamento, a falta de movemento afectou no control da enfermidade. Así, para a parte técnica deste proxecto contaron co apoio da Asociación de nenas, nenos e xente nova con diabetes (Anedia). Doutra banda, o Mega Builder Team de Ribeira fíxose co Premio Xunta de Galicia ao Emprendemento cunha proposta que anima a ser máis activos mediante incentivos en comercios e hostalaría. E o Robot City Pobra Junior levou un premio pola presentación dunha maqueta con elementos de robótica relativos ao deporte.

Mega Builder Team

Mega Builder Team

Robot City Pobra Junior

Robot City Pobra Junior