Últimas Novas

Comezan as obras de acondicionamento na escola da Angustia

Comezan as obras de acondicionamento na escola da Angustia

Na xornada de onte, mércores 25, iniciáronse na escola de educación infantil da Angustia as obras de mellora e acondicionamento das aulas situadas na planta baixa. Ata o lugar desprazáronse no mediodía de onte o alcalde, Xosé Lois Piñeiro, e a concelleira da Educación, Genoveva Hermo.

A edil expuxo que a dita actuación consiste na colocación dun illamento térmico no perímetro da edificación e nun tradosado con cartón-xeso, na renovación da carpintaría interior, nunha nova instalación eléctrica e na colocación de vinilo no chan. En consecuencia, afirmou que se “mellorará sensiblemente o edificio en xeral e a vida dos escolares en particular.” A obra foi adxudicada á empresa CYS Hispania S.L. e o importe ascende a 22 660’90 euros (cunha rebaixa de 2 732’32 euros sobre o prezo de licitación) con cargo aos orzamentos municipais. O prazo de execución é dun mes e medio.

Pola súa parte, o rexedor lembrou que o edificio tamén acolle o centro social no primeiro andar, nun espazo que se adecúa para o desenvolvemento das aulas para os/as 12 escolares. Tamén fixo fincapé nos investimentos feitos nas escolas nos últimos anos, precisando que “esta vén sendo unha máis que vai completar toda unha actuación neste centro” e engadiu que, despois das obras, “vai quedar perfectamente dotada.”