Concellaría da Igualdade
O seu obxectivo principal é contribuír a reduci-las desigualdades existentes entre mulleres e homes, impulsando políticas transversais e de acción positiva e artellando mecanismos de prevención e tratamento específicos para as situacións de violencia de xénero. Esta área dispón de recursos para ofrecer unha atención e intervención global dirixida ás mulleres cos cales proporcionarlles información, orientación, asesoramento xurídico e atención psicolóxica. Ademais, o equipo encárgase da programación, planificación, intervención e realización de proxectos de dinamización de políticas de igualdade.
HOMENAXE ÁS VÍTIMAS DA VIOLENCIA DE XÉNERO
Isabel Soler Rivas
‘Como agua’
2024
“A muller sae do papel da denuncia, do proceso xudicial, do asimilado pola sociedade…, para se introducir nunha auga renovadora, implicándonos a todas e todos, a través do noso reflexo na escultura, na construción dun novo e equitativo papel da muller na sociedade.
En homenaxe a tódalas mulleres vítimas da violencia de xénero.”
FICHA TÉCNICA
– Autora: Isabel Soler Rivas
– Título: ‘Como agua’
– Material: aceiro mariño (aceiro inoxidábel AISI-316L) puído nun espello
– Medidas:
· Prancha: alto, 200 cm
ancho, 141’5 cm
espesor, 1 cm
· Muller: alto, 180 cm
espesor, 1 cm
· Ondas: ancho, 60 cm
alto, 29 cm
profundidade, 22’5 cm
espesor, 0’3-0’15 cm
– Cronoloxía: 2023-2024
– Localización: Xardíns de Valle-Inclán, A Pobra do Caramiñal (A Coruña)
XUSTIFICACIÓN
A obra ‘Como agua‘ consta de dous bloques de pezas:
Unha delas consiste nunha prancha de aceiro co formato folio, instalada verticalmente, coa marca dunha dobrez na metade. No seu interior recórtase a silueta dunha muller núa, que deixa o oco do seu corpo na dita prancha, da cal se independiza cun esbozo de movemento cara á auga, representada no outro bloque de pezas.
Este consta de tres formas rectangulares volumétricas, que emulan as ondas da auga, ben do mar, ben dun río.
‘Como agua‘ trata a temática da violencia de xénero dende un punto de vista poético, positivo, sosegado, pero firme e comprometido, a través de diferentes simboloxías:
As diversas formas de exerce-la violencia de xénero cara á muller implican sempre algún papel; papel que representa na obra a prancha de aceiro co recorte da silueta feminina. Este papel pode se-la folla dunha denuncia, do proceso ou da sentenza dun xuízo…, que ás veces dobran pola metade e cando se despregan de novo conservan a marca. Por iso hai a dobrez na prancha de aceiro, dobreces que teñen as leis e outros ámbitos da sociedade e da cultura, que nin sempre queren ou poden favorece-la vítima.
Ese papel tamén pode simboliza-lo papel de toda a sociedade cara á violencia de xénero.
En ‘Como agua’, a muller sae do papel da denuncia, do proceso xudicial ou dese papel imposto pola sociedade que xa a enmarca previamente polo seu xénero e sexo. Ela represéntaas todas e todos.
Ela, el, nosoutras, nosoutros saímos para nos introducirmos na auga. Unha auga viva, en movemento, que se renova e que nos renova.
As pezas que conforman ‘Como agua‘, por seren de aceiro puído, tamén son espello. Este reflicte a luz, ofrecendo escintileos de positividade, e reflicte o contorno, do cal as persoas que por el transitan fan parte. O reflexo que nos devolve a nosa imaxe mentres observámo-la dela (a silueta feminina) fainos cómplices e implícanos no papel da erradicación da violencia de xénero cara ás mulleres, á vez que crea un novo escenario e introduce na auga a silueta feminina e as persoas transeúntes.
Programa de promoción da igualdade e prevención e tratamento da violencia de xénero
O servizo de información, asesoramento xurídico e atención psicolóxica presta unha atención integral personalizada e confidencial a mulleres vítimas de violencia de xénero, así como a mulleres en situación de vulnerabilidade, intentando mellorar a súa situación persoal, social e laboral, ademais de prestar atención tamén as súas fillas e fillos.
O horario é os luns, de 09.30 a 13.30 e de 15.30 a 20.30 horas; os martes, mércores e venres, de 09.30 a 13.30 horas; e os xoves, de 09.00 a 14.00 horas.
Obxectivos:
- Prestar atención, información, apoio, asesoramento xurídico e atención psicolóxica as vítimas de violencia de xénero para mellora-la súa situación persoal, social e laboral e a aquelas mulleres en situación de vulnerabilidade.
- Promociona-la igualdade como medida para previ-la violencia de xénero.
Resultados:
Proporcionar unha atención integral ás vítimas de violencia e previ-la violencia de xénero, así como dar apoio, información, orientación e atención a tódalas mulleres en situación de vulnerabilidade que o precisen.
Esta actividade está cofinanciada pola Unión Europea co obxectivo de previ-la violencia de xénero.
