O Fondo Galego de Cooperación e Solidariedade inicia o ciclo 2023-2027

Cedida polo Fondo Galego de Cooperación de Solidariedade

Representantes de administracións socias do Fondo Galego de Cooperación e Solidariedade participaron nunha Asemblea Xeral no 4 de outubro para a aprobación da composición da nova Comisión Executiva. Tres deputacións (A Coruña, Pontevedra e Lugo) e preto dun cento de concellos -entre eles, o da Pobra do Caramiñal- integran este organismo.

A xuntanza comezou cun balance do período 2019-2023; etapa na que se adoptou un sistema de cotas máis proporcional, o relanzamento da cooperación técnica realizada polo persoal municipal, o impulso á implantación da Axenda 2030 no eido local ou a creación da Rede de Autoridades Locais da Lusofonía polos Obxectivos de Desenvolvemento Sostible (ODS).

Cedida polo Fondo Galego de Cooperación de Solidariedade

Tamén se fixo un repaso das accións que se están a desenvolver no presente ano: proxectos de cooperación ao desenvolvemento nos países do Sur Global (sete actuacións directas ou a través de ONGD galegas no Sáhara, Mozambique, Guinea-Bissau, Guatemala, Nicaragua e El Salvador; o programa Especialistas en Cooperar, o IV Foro da Cooperación Municipalista da Lusofonía e a organización dunha misión aos campamentos de persoas refuxiadas saharauís), iniciativas de sensibilización e fortalecemento institucional (II Encontro Estatal de Gobernos Locais e Cooperación Internacional e recentes visitas de delegacións de varios países para intercambiar experiencias) e traballos focalizados na área da educación para a cidadanía global (o proxecto europeo People & Planet).

Presentouse, ademais, a campaña 313 Olladas Solidarias que o Fondo Galego desenvolverá neste último trimestre por toda Galicia para amplia-lo número de administracións locais socias.