Últimas Novas

O pobrense Museo Valle-Inclán ofrece, xunto con outras institucións, o espectáculo <i>Palabras en pedra</i>

O pobrense Museo Valle-Inclán ofrece, xunto con outras institucións, o espectáculo Palabras en pedra

Cedida por Jerry Noia

O Museo Valle-Inclán da Pobra do Caramiñal, na súa liña de achega-la obra artística do intelectual a aquelas localidades vinculadas á súa figura e textos, practica un labor de promoción institucional non só a nivel comarcal senón tamén a nivel galego. En consecuencia, o Concello de Santiago de Compostela, o Museo Valle-Inclán e Teatro En Punto ofrecen para o público da capital galega o espectáculo Palabras en pedra, unha representación de cadros escénicos a partir de textos, de depurado estilo modernista, do autor que anos despois será o creador e o máximo expoñente do xénero do esperpento.

A cita terá lugar no 8 de decembro, ás 12.00 horas, no claustro de San Domingos de Bonaval, cedido para tal ocasión por colaboración do Museo do Pobo Galego. Seguiranse as medidas implantadas por mor da COVID-19, polo cal as persoas interesadas en asistir deben reserva-la súa entrada de balde a través do enderezo electrónico teatroenpunto@gmail.com.

A dramaturxia e dirección corren a cargo de Roberto Leal quen, ademais, forma parte do elenco xunto con Gloria Rico (actriz) e Sabela Dacal (coa música en directo). Os textos que serán representados son Juan Quinto, A miña irmá Antonia, Milón de Arnoia, curtas de ficción literaria valoradas entre os principais contos de asunto/temática galega.

Cedida por Jerry Noia

Cómpre lembrar que Santiago de Compostela, como capital galega importante no seu decurso biográfico, literario e sentimental, onde está sepultado, realiza periódicas homenaxes a Valle-Inclán.

Promoven, por cooperación institucional, o Concello de Santiago de Compostela e o Museo Valle-Inclán pobrense, co patrocinio do consistorio santiagués, produción de Teatro En Punto e colabora, cedendo un espazo monumental, o Museo do Pobo Galego.