PRAIAS

Pés descalzos na area

PRAIA DO AREAL

Praia de contorno urbanizado, de augas tranquilas, area branca e fina, ideal para a práctica de deportes náuticos. A seguir, e ó outro lado da desembocadura do río Xundeirama, atópase a praia de Santo Antonio. Esta última e a zona sur da praia dos Areos son as únicas do noso concello ás que podes acudir coa túa mascota. Ocupación estival media-alta.

PRAIA DE SANTO ANTONIO

PRAIA DA ILLA – A LAXE

A tan só uns metros da praia da Lombiña-Cabío cara ó sur, atópase este fermoso areal de augas quedas, resgardado por un frondoso piñeiral. Trátase dunha praia familiar. Ocupación estival alta.

PRAIA DA LOMBIÑA – CABÍO

É a praia mellor acondicionada canto ós servizos se refire: zonas de aparcamento, posto de socorro, merendeiro, restaurantes e empresas de actividades náuticas son algúns deles. Trátase dun areal resgardado, de augas tranquilas e area branca. Destaca a súa enseada en forma de cuncha e o seu paseo marítimo, con preciosas vistas sobre a ría da Arousa. Ocupación estival alta.

PRAIA DA BARCA

Cara ó norte, e separada da praia da Lombiña-Cabío por un rochedo, atópase a praia da Barca que, pola súa proximidade, comparte servizos coa anterior. Ideal para familias. Ocupación estival alta.

PRAIA DA CORNA

Trátase do areal máis extenso do termo municipal (1500 m aprox.) e, sen dúbida, dun dos máis virxes, pois conserva as súas lombas dunares con vexetación propia dos ecosistemas costeiros e conta cos servizos máis básicos (limpeza e accesos). Praia menos resgardada ca outras, pero de ondada tranquila. Ocupación estival media.

Outras praias

Se preferires pequenas e solitarias praias, na Pobra do Caramiñal temos varias onde elixir; iso si, lembra que todas elas conservan o seu estado natural e contan só cos servizos máis básicos (limpeza e accesos).

CALAS DE NIÑEIRIÑOS E AGRONOVO

Situadas na parroquia do Xobre, son as únicas praias naturistas da Pobra do Caramiñal.

Na parroquia de Santo Isidoro, podes atopa-la praia da Ribeiriña, a da Mercé, Cons-Raposiños e a pequena praia de San Lázaro, todas elas accesibles a través de sendeiros e resgardadas por contornos arborados.