A Semana do Mar da Pobra arranca nesta fin de semana coa Feira Mariñeira
Na presentación da Semana do Mar no 29 de xuño de 2023
A Pobra do Caramiñal pon a vista no litoral cunha nova edición da Semana do Mar, que se desenvolve, como xa é o costume, no mes de xullo. A Concellaría do Turismo lanza un programa cunha vertente lúdica, pero tamén cun importante factor divulgativo, que arranca coa feira mariñeira nos días 7, 8 e 9. Máis de corenta postos de artesanía e alimentación espallaranse polo núcleo urbano, que se engalanará con temática náutica: a praza do Cantón da Leña, a praza Victoriano García Martí, as rúas Unión e do Estremo, e os Xardíns de Valle-Inclán. O ambiente animarase con numerosos espectáculos itinerantes, ademais de contar cunha área exclusiva para o divertimento das crianzas.
No día 11 será o momento de vivi-la experiencia do remo cunha visita ao club da localidade. O punto de encontro establécese na oficina de información turística (Casa Mariñeira), situada no parque do Castelo, ás 11.00 horas.
Haberá tamén ocasión de coñece-los bivalvos presentes na costa e o proceso de extracción destes a través dunha xornada de turismo mariñeiro que terá lugar na praia dos Raposiños, no día 13. A saída efectuarase ás 09.00 horas da dita instalación municipal. Trátase da única actividade que require pagamento: 12 euros por persoa adulta e de balde para menores de 10 anos.
O momento de se mergullar na memoria e as historias da cultura do mar no municipio chegará no día 15 cun itinerario guiado por Manuel Gago. A expedición partirá ás 10.30 horas do aparcadoiro de San Lázaro, a carón da farmacia.
A maiores, nesa mesma tarde, a compañía Diáspora Teatro representará a peza infantil O peirao, ás 20.30 horas, no Cantón da Leña.
Agás o mercado mariñeiro e a función, o resto da programación está suxeita a grupos limitados, polo cal é necesaria a inscrición previa. Para tal fin, habilítanse diferentes vías: de maneira presencial na propia oficina do turismo, no enderezo electrónico turismo@apobra.gal ou telefonicamente no 981843280 (marcando a extensión 2035), 687482835 e 671090262.
