A Pobra sortea 200 caramiñas diarias e unha viaxe familiar a Eurodisney neste Nadal

Veciñanza e visitantes deberán descubri-las caramiñas ou recunchos do Nadal repartidos polo núcleo urbano da Pobra do Caramiñal se queren optar aos 200 euros diarios que sorteará o Concello, co formato de vale/caramiñas, para trocar nos comercios e negocios locais adheridos, ademais da viaxe familiar a Eurodisney para catro persoas que patrocina a empresa Congalsa. Os detalles foron debullados pola concelleira da Promoción Económica, Amparo Cerecedo, e a directora das relacións externas de Congalsa, Isabel Cañas.

Trátase dunha iniciativa máis que impulsa a Concellaría da Promoción Económica no seo da campaña Consegue Caramiñas, Comparte Nadal para a dinamización económica e social do municipio por estas datas.

Esta acción oriéntase ás redes sociais e comprende o período do día 3 de decembro ao 5 de xaneiro. Consistirá en sacar fotos nos photocall coñecidos como recunchos do Nadal e compartilas no apartado de historias do Instagram mencionando a conta @caraminhasnapobra. Estes espazos habilitaranse onda o parque do Castelo, na praza de Galicia, na praza dos Irmáns Axeitos, no parque de Raquel Fernández Soler e no Fogar de Nadal.

Dunha banda, sortearanse diariamente 200 euros en caramiñas entre os días 3 e 31 de decembro. Cada xoves darase a coñece-los nomes das persoas gañadoras que participaron dende a semana anterior, agás na última semana do mes de decembro, pois as afortunadas dos días 29, 30 e 31 comunicaranse no 2 de xaneiro.

Os vales de compra poderanse recoller cada sábado no Fogar do Nadal que se disporá na oficina do turismo, situada na Casa Mariñeira, en horario de 10.00 a 13.00 horas.

E ata o día 5 de xaneiro existe a posibilidade de gaña-la viaxe a Eurodisney entre tódalas instantáneas tomadas dende o inicio da actividade.