O voluntariado da Pobra recibe o aguinaldo do Nadal
O Nadal é tempo de compartir, de solidariedade… Pero hai xente que o fai extensible a todo o ano para beneficio da sociedade. E o Concello da Pobra do Caramiñal quixo recoñece-lo labor e importancia do equipo do voluntariado facéndolle entrega do tradicional aguinaldo no salón de plenos do consistorio, na tarde do 11 de decembro.
Preto dunha trintena de persoas do ámbito do benestar animal (a través da Protectora Moura), medioambiental, social e da seguridade (representada no corpo da Protección Civil) recibiron cadanseu lote de produtos típicos destas datas.
No acto participaron o alcalde e titular da Concellaría da Seguridade, José Carlos Vidal; a edil dos Servizos Sociais, Amparo Cerecedo; a súa homóloga das Relacións Institucionais, Patricia Lojo; e a concelleira dos Servizos Municipais, Estefanía Ramos.
Durante a súa intervención, o rexedor tivo palabras de eloxio para o traballo altruísta de tódalas persoas que exerceron como voluntarias ao longo deste 2024, moitas delas repetindo ano tras ano, co obxectivo de contribuír á mellora da calidade de vida da cidadanía pobrense.
