A esencia viquinga invade o libro Emil el rival

A primeira entrega da saga viquinga Emil el rival desembarcou no Auditorio do Museo Valle-Inclán da Pobra do Caramiñal na tarde do 24 de marzo. Emilio Vázquez Fernández é o artífice deste libro de ficción histórica ambientado no século IX que narra as aventuras de Emil, quen aos oito anos é apresado por unha frota viquinga durante unha incursión polas augas do río Volia para, xa en terras escandinavas, ser adoptado por un nobre e instruído para a guerra. Comeza así a lenda deste personaxe viquingo de ollos marróns e cabeleira escura e rizada.

No acto de presentación, o autor estivo arroupado pola concelleira da Cultura, Patricia Lojo (PSdeG-PSOE), e o edil boirense Marcos Fajardo. Durante a súa intervención, Lojo quixo destacar a complexidade de traballar co xénero da ficción histórica, pois se ben os personaxes e a trama son froito da creatividade, deben responder a un contexto fidedigno que esixe un proceso de documentación.

Quixo así enxalzar a capacidade do escritor para elaborar un texto que conecta a súa inventiva coa realidade pasada da costa galega, na que houbo unha forte presenza dos pobos escandinavos. Isto tradúcese en que haxa localidades que, na actualidade, celebran romarías que rememoran a resistencia da súa poboación aos ataques viquingos; un exemplo de como determinados fitos transcenden á cultura nos nosos días.