O “mellor remo” do país darase cita na Pobra nos LXXVIII Campionatos de España de Traiñeiriñas

A Pobra volverá ser escenario do “mellor remo” por medio da celebración dos LXXVIII Campionatos de España de Traiñeiriñas. As citas, organizadas polo Club Remo Puebla e a Federación Española de Remo en colaboración da Secretaría Xeral para o Deporte, a Deputación da Coruña e o Concello da Pobra, terán lugar o sábado, 24 de maio, e o domingo, día 25.

Á presentación do certame, que se levou a cabo nas instalacións do Club, asistiron o alcalde, José Carlos Vidal, o concelleiro de Deportes, Eloy Sobrido, o secretario xeral para o Deporte da Xunta de Galicia, José Ramón Lete, o presidente da Federación Española de Remo, Miguel Ángel Millán Carrascosa, o vicepresidente da Federación Galega de Remo, Gustavo Vázquez, e o presidente do Club de Remo Puebla, Emilio Dieste.

Durante a súa intervención, o rexedor cualificou o campionato como unha “oportunidade única para gozar do mellor remo do país”. Vidal agradeceu a colaboración dos distintos organismos e destacou o “esforzo” do Club Remo Puebla. Vidal lembrou que a dedicación da entidade valeulle para colleitar numerosos logros ao longo da tempada, entre eles, os obtidos no Campionato de España de Bateis.

Dinámica das probas

Os Campionatos arrincarán o sábado, día 24 ás 11.00 horas, coas probas eliminatorias. Haberá dúas tandas de catro equipos por categoría e os que resulten gañadores enfrontaranse nas finais o domingo, 25 de maio, a partir das 11.00 horas.

Tal e como o presidente do Club avanzou na conferencia de prensa, será un “evento multitudinario” que contará coa presenza dunhas 100 embarcacións e de 500 deportistas procedentes de toda a xeografía española.