A Pobra homenaxea as persoas represaliadas polo franquismo e as súas familias no Día da Galiza Mártir
Ao abeiro da programación impulsada dende a Administración local pobrense para a reivindicación da memoria histórica, a localidade foi escenario de dous actos conmemorativos con motivo do Día da Galiza Mártir, no 17 de agosto.
Acompañado de membros da corporación municipal e veciñanza, o concelleiro da Memoria Histórica, Xabier Santos (BNG), procedeu coa tradicional ofrenda floral na rúa Alexandre Bóveda, situada nas inmediacións da casa consistorial. Na súa intervención, o edil centrouse no exposto en O libro negro da lingua galega, de Carlos Callón, que se presentou recentemente no municipio. Puxo así de manifesto que o asasinato de Bóveda nun día coma o de onte no ano 1936 foi “unha celebración macabra da sublevación militar” e que a cuestión da lingua tivo un papel importante ao non lle deixar exerce-la súa defensa en galego; só llo permitiron en castelán, por considera-lo primeiro como un dialecto.
Posteriormente, a atención trasladouse aos Xardíns de Valle-Inclán, onde tivo lugar a exposición do bosquexo da escultura pola memoria histórica elaborada por Manuel Teira, quen se uniu ao acto. Xabier Santos explicou que a figura pretende “homenaxear, honrar e representar tódalas persoas asasinadas, represaliadas, exiliadas e recluídas en campos de concentración, coma o que existía na Pobra” e, deseguido, efectuou a lectura dun poema de Concha Barreiro. Pola súa parte, Manuel Teira indicou que coa escultura se busca “dignifica-los sentimentos dun pobo que sufriu o atropelo da ditadura”, polo cal se rende unha homenaxe á Galiza Mártir, título que abraza o concepto que tan ben definiu Castelao nos seus álbums da Guerra Civil e que a través desta obra se pretende representar. “Darlle palabra ao silencio, que a pedra fale por si soa”, engadiu.
O material que se vai empregar será granito do país e constará dunhas dimensións de aproximadamente 1’60 x 1’20 x 1’20 metros ao cal hai que lle engadi-la peaña de arredor de 0’25 centímetros de alto. A inauguración estímase entre finais de novembro e principios de decembro.
A programación do Mes da Galiza Mártir iniciouse xa no día 9 coa representación de A señora de Forcadela a cargo da compañía teatral Os Quinquilláns e concluirá no día 25 coa proxección do filme Reboiras. Acción e corazón, de Alberte Mera.
Esta última cita desenvolverase no teatro cine Elma, ás 20.00 horas. A dita longametraxe leva á pantalla un retrato de Moncho Reboiras dende a vertente humana e política. A súa vida e o seu pensamento son recreados a través de entrevistas a 28 testemuñas que compartiron con el distintas etapas da súa traxectoria vital. Inclúe, ademais, filmacións históricas e revive as súas últimas horas mediante secuencias de ficción.
A entrada é libre ata completa-la cabida.
