Ruta Xacobea do Mar da Arousa e Río Ulla, tódalas fins de semana de XUÑO e de SETEMBRO en veleiro

            Esta fin de semana comezámo-las rutas en veleiro para navegarmos por parte da Ruta Xacobea do Mar da Arousa e Río Ulla, a cal conmemora o traslado do apóstolo Santiago dende Palestina ata Iria Flavia.

Unha ruta de gran riqueza paisaxística e cultural. No seu transcurso pola ría da Arousa verase a costa de Boiro, Rianxo, A Illa de Arousa, Catoira e Vilagarcía de Arousa. Praias, calas, cabos, enseadas, pontes e parte dos cruceiros que pertencen ó único viacrucis marítimo-fluvial do mundo.

Haberá máis viaxes, tódalas fins de semana de xuño e de setembro.

Consiste nunha travesía guiada de 6 horas. Desembarcarase en Rianxo ou Vilagarcía para comer.

Sairase ás 11.00 h do porto náutico da Pobra do Caramiñal e regresarase sobre as 18.00 h

Viaxarase en grupos reducidos: como máximo 10 persoas poden ir en cada viaxe. É obrigatorio levar máscaras por precaución sanitaria.

As reservas realizaranse por correo electrónico no enderezo turismo@apobra.gal ou chamando por teléfono ó 671 090 262.

Os prezos por persoa son de 12€ e, os/as nen@s menores de 12 anos, 8€. As familias con máis dun/dunha nena terán desconto.

Por agora, é preciso o pagamento por transferencia bancaria.

No suposto de ir mal tempo, adiarase a viaxe para outro día.

É unha actividade financiada polo programa “O Teu Xacobeo” da Consellaría de Cultura e Turismo da Xunta, organizada pola Concellaría de Turismo do Concello da Pobra do Caramiñal.