A Pobra contará con composteiros domésticos e comunitarios
Este ano implantaranse por vez primeira no concello da Pobra do Caramiñal 50 composteiros domésticos e 3 comunitarios, despois de que en 2019 a Administración local resultase beneficiaria dunha subvención de 14020’26 euros por parte do Ministerio para a Transición Ecolóxica e o Reto Demográfico. Así o anunciaron no mediodía de onte o alcalde Xosé Lois Piñeiro, a concelleira do Medio Ambiente, Genoveva Hermo, e a técnica municipal desta área, Beatriz González.
Neste senso, seleccionaranse 50 vivendas para a instalación de composteiros domésticos (tomándose a parroquia do Xobre como punto de partida deste proxecto piloto) e 3 espazos públicos para os comunitarios.
En canto á veciñanza do Xobre que desexe participar de xeito voluntario, o prazo para a presentación de solicitudes permanecerá aberto durante un mes, formalizándose a través do rexistro, preferiblemente, o telemático. Entre os requisitos figuran dispor dunha área exterior (xardín, horta) cunha superficie mínima de 25 metros cadrados, e que ese terreo pertenza ao domicilio habitual. Os requisitos de selección son os seguintes: número de persoas que residen no domicilio habitual (1 punto para domicilios con 3 residentes ou menos, 2 puntos para domicilios con 4 ou 5 residentes, e 3 puntos para domicilios de 6 ou máis residentes); que sexa vivenda habitual (darase 1 punto en caso afirmativo); que se resida no Xobre (darase 1 punto en caso afirmativo e este criterio responde á elección desta zona no proxecto piloto, pero non é excluínte para outros lugares); e no caso de empate resolverase por un sorteo. Ademais, a persoa solicitante comprométese, de ser elixida, a segui-las pautas marcadas polo programa de compostaxe doméstica de biorresiduos do Concello, así como a asistir ao curso preparatorio de compostaxe e a facilita-lo seguimento do proceso no seu domicilio.
Por outra banda, os composteiros comunitarios contarán cunha valla delimitadora, estruturas no interior e cartel explicativo, ademais de que non supoñen unha fonte xeradora de malos cheiros nin de pragas, pois estarán controlados pola brigada municipal, ademais de contar coa colaboración cidadá. Para poder facer uso, a veciñanza terá a oportunidade de requiri-la súa participación nesta outra alternativa (especialmente dirixida a quen vive en pisos ou casas sen terreo) e o proceso será semellante para o dos domésticos. O depósito realizarase cun recipiente facilitado pola Administración local a aquelas persoas que resultasen escollidas.
Cómpre sinalar que a Asociación para a Defensa Ecolóxica de Galiza (ADEGA) será quen se encargue de realiza-la formación e o seguimento.
O obxectivo das referidas accións reside en reduci-lo peso da fracción do resto, recollida nos contedores verdes (supón o 53% da bolsa do lixo), ademais de traducirse nunha redución dunha factura pola xestión de Sogama, o cal redundaría no eido medioambiental e económico. De feito, o Concello non descarta subscribirse á liña de composteiros que oferta esta empresa, para así darlle continuidade á ampliación do servizo.
Así mesmo, esta actuación enmárcase como un dos camiños por seguir para cumprir coas directrices da Unión Europea para chegar á dedución dunha porcentaxe da fracción do resto que se xera. Ademais, están os Plans de Impulso ao Medio Ambiente, coñecidos como PIMA, que son unha ferramenta para a posta en marcha de medidas de loita contra o cambio climático a nivel nacional; e o Plan Estatal Marco de Residuos (PEMAR).
Para darlle continuidade ao proxecto da compostaxe están solicitadas dúas subvencións en 2020 pendentes da resolución: unha por parte do Ministerio para a Transición Ecolóxica e o Reto Demográfico de 40000 euros destinada á compra de 210 composteiros individuais e 1 comunitario; e outra a través da Xunta por un importe de 30000 euros para 50 composteiros individuais e 1 biotrituradora para a produción de materia seca para os comunitarios.
