A travesía Navega el Camino recala na Pobra por segundo ano consecutivo
Fátima Cachafeiro, Charo Varela, Xosé Lois Piñeiro, Ángela Pumariega, José Ramón Romero e Patricia Alcubilla
Un total de 35 persoas participantes na VI Travesía Navega el Camino, impulsada por North Marinas, arribou na xornada do 17 de xuño á Pobra do Caramiñal. Sete embarcacións, das cales, o Kais está capitaneado pola campioa olímpica Ángela Pumariega, cunha tripulación feminina formada por profesionais do deporte, a educación, a ciencia, o coaching e a comunicación que acollen a bordo, en cada etapa, a diferentes profesionais do sector marítimo. Buscan así visibilizar a contribución da muller ao desenvolvemento dese ámbito e promover a gran variedade de vocacións vencelladas ao mar.
O alcalde da Pobra do Caramiñal e vicepresidente da Mancomunidade Barbanza Arousa, Xosé Lois Piñeiro; a concelleira do Turismo, Charo Varela; o rexedor de Boiro, José Ramón Romero; e a xerente da Mancomunidade, Fátima Cachafeiro, recibiron o equipo no Náutico e convidárono a xantar no restaurante situado nesas mesmas instalacións.
Posteriormente, tres mariscadoras da Asociación Mar da Pobra impartiron unha charla sobre turismo mariñeiro ao tempo que se proxectaba un vídeo sobre a materia. Explicaron así en que consiste o seu traballo, ademais de ensina-lo instrumental que empregan e os diferentes bivalvos que extraen dos areais do municipio pobrense.
Charla das mariscadoras da Asociación Mar da Pobra
As actividades concluíron coa entrega dunha bolsa de agasallos -conformada por material de promoción do turismo- para cada unha das persoas asistentes.
Chegarán no día 19 a Santiago de Compostela, tras realiza-lo último tramo do Camiño a pé, despois de percorrer a vela parte da costa atlántica norte, con saída de Hondarribia no 4 de xuño.
Embarcación capitaneada por Ángela Pumariega
Ángela Pumariega na embarcación que capitanea
