O Concello da Pobra convoca un proceso selectivo para formar unha bolsa de emprego de monitorado de tempo libre
Imaxe de arquivo dun obradoiro de conciliación no 2020
Despois de seren aprobadas as bases reguladoras que rexerán o proceso selectivo para a formación dunha bolsa de emprego para monitorado de tempo libre, o Concello da Pobra do Caramiñal procede a convoca-las probas selectivas mediante un concurso-oposición para a cobertura en réxime laboral temporal destes postos.
Os labores, entre outros, son a monitorización dos servizos de Madruga e Comedor; imparti-los obradoiros de conciliación; dinamiza-las actividades lúdicas e de tempo libre dos programas culturais e deportivos das áreas dos deportes, da cultura e da igualdade; atende-los obradoiros de actividades manuais, natureza, tempo libre ou igualdade; e calquera outra tarefa propia da praza.
As persoas aspirantes deberán cumprir unha serie de requisitos; entre eles, te-la consideración de profesionais da educación no tempo libre na modalidade de monitor/a, para o cal deberán acreditar estar en posesión dalgunha das acreditacións seguintes: o título de monitor ou monitora de actividades de educación no tempo libre infantil e xuvenil; o certificado de profesionalidade de dinamización de actividades de educación; ou o título da formación profesional que capacite de xeito expreso para o desempeño desta ocupación. Ademais disto, as persoas que sexan destinadas ós Servizos de Madruga e Comedor deberán presentar no momento da contratación a posesión do carné de manipulación de alimentos.
Para a inscrición no proceso selectivo, presentarase a solicitude conforme o anexo II das referidas bases a través do rexistro xeral de entrada do Concello da Pobra do Caramiñal, no horario das 09.00 ás 14.00 horas, ou por medio da sede electrónica municipal. O período é de 10 días hábiles, que se contan dende este mesmo martes 26, tras ser anunciada onte a convocatoria no Boletín Oficial da Provincia da Coruña (BOP). O dito trámite tamén se pode formalizar en calquera dos medios determinados na Lei do procedemento administrativo común das administracións públicas. Xunto coa solicitude de participación, débense achega-las fotocopias da documentación xustificativa.
Toda a información detallada está á disposición no taboleiro de anuncios do Concello e na mencionada sede electrónica.
