A Pobra prepárase para vivir o Carme dos Pincheiros do 14 ao 17 de agosto
A Pobra do Caramiñal prepárase para celebrar unha nova edición do Carme dos Pincheiros, que se desenvolverá do 14 ao 17 de agosto cunha ampla axenda na que a música e a cultura popular compartirán protagonismo con algunhas das tradicións máis arraigadas da vila.
Na presentación participou a concelleira de Cultura, Patricia Lojo, xunto con representantes da Comisión de Festas do Carme dos Pincheiros, que deron a coñecer os principais detalles das catro xornadas.
Durante a súa intervención, Lojo salientou o carácter especial desta cita e o seu forte vínculo coa identidade da Pobra. Fixo especial fincapé nos xigantes e cabezudos, que forman parte da historia local e constitúen un dos elementos que lle confiren unha personalidade propia ao Carme.
A concelleira quixo recoñecer tamén o traballo da rapazada que se encarga de sacar estas figuras á rúa e facelas bailar durante estes días. Destacou as horas de dedicación, o esforzo e a ilusión que poñen en manter vivo un legado que continúa pasando dunha xeración a outra.
Neste carácter popular teñen tamén un papel destacado os San Juerguines, unha das citas máis características do Carme dos Pincheiros. A súa presenza nas rúas, xunto coa tradicional Festa da Auga, forma parte dunha celebración que mantén costumes propios e consegue que distintas xeracións compartan e dean continuidade a unha maneira moi pobrense de vivir estas datas.
Lojo destacou tamén o apoio do Concello á celebración e explicou que este ano se realiza unha achega de 35.000 euros á Comisión de Festas, ademais de asumir directamente a programación do venres. A colaboración municipal abrangue tamén as montaxes, as infraestruturas, a limpeza, a coordinación e outras tarefas necesarias para o correcto desenvolvemento das celebracións.
A edil agradeceu, así mesmo, a dedicación da Comisión do Carme dos Pincheiros, poñendo en valor o esforzo e as numerosas horas de traballo que require a organización dunha cita destas características.
Espazo Violeta durante o Carme dos Pincheiros
Nesta edición, o Carme dos Pincheiros contará tamén cun Espazo Violeta, unha iniciativa impulsada pola Concellería de Igualdade.
Con este recurso, o Concello continúa apostando por políticas que contribúan a facer das festas e dos espazos de lecer contornas seguras e respectuosas para todas as persoas, promovendo a sensibilización e a prevención fronte ás violencias machistas.
A iniciativa súmase ás accións municipais orientadas a favorecer unhas celebracións baseadas no respecto, na igualdade e na convivencia.
Catro días de música e cultura popular
O programa comezará o venres 14 de agosto. Ás 19.00 horas sairán os xigantes e cabezudos acompañados polo grupo de gaitas Trécola e, ás 19.30 horas, terá lugar a imposición de escapularios aos novos confrades. Ás 20.00 horas realizarán un percorrido desde a praza Alcalde Segundo Durán ata o Concello e, ás 21.00 horas, celebrarase o pregón. A partir das 22.30 horas chegarán Déixate Estar, Firadela, Human, Eme Music e DJ Marcos Magán.
O sábado 15 arrancará ás 11.00 horas coa Banda de Música de Vilaboa, a Banda de Gaitas Airiños de Fene, Os Caraveiros e as formacións de gaitas Xiada, Churimás e Os Arghalleiros. Ás 12.00 horas haberá xogos populares con Axóuxere e un novo percorrido dos xigantes e cabezudos xunto a Trécola. Ás 13.00 horas, a Banda de Música de Vilaboa actuará no xardín, mentres as distintas agrupacións ofrecerán concertos polas prazas da vila.
Ás 16.30 horas chegará un dos momentos máis característicos da xornada, cos San Juerguines e a Festa da Auga, que volverán encher as rúas e manter viva unha das tradicións máis recoñecibles destas celebracións. A partir das 22.30 horas, a noite estará protagonizada pola Orquestra Capitol e Discomóbil Karamelo.
O domingo 16 comezará ás 11.00 horas coa Banda de Música de Noia, a Banda de Gaitas de Calo, Os Caraveiros, Xiada, Os Arghalleiros e Queicoa. Ás 11.30 horas terá lugar a entrada da Brilat e o desfile e, ás 12.00 horas, celebrarase a benvida á Brilat con arrancadeira no Cantón da Leña. A esa mesma hora, os xigantes e cabezudos volverán percorrer as rúas acompañados por Trécola. Ás 13.00 horas actuará a Banda de Música de Noia no xardín e, ás 18.30 horas, celebrarase a misa solemne, a procesión da Virxe do Carme e a ofrenda floral. A partir das 22.30 horas será a quenda de Panorama City e Chocolate Disco Móbil.
O luns 17 abrirase ás 11.00 horas coa Banda de Música de Calo, a Banda de Gaitas Herba Grileira, Xiada, Os Caraveiros, Ar de Loureda e Os Arghalleiros, ademais do Tren Pincheiro. Ás 12.00 horas abrirá Pincheirolandia; ás 12.30 horas, os xigantes e cabezudos volverán ás rúas xunto a Trécola e, ás 13.00 horas, terá lugar a Festa da Espuma e o concerto da Banda de Música de Calo no xardín. Ás 13.30 horas está previsto o percorrido das diferentes formacións de gaitas.
Pincheirolandia retomará a actividade ás 17.00 horas e, ás 20.00 horas, os xigantes e cabezudos protagonizarán outro percorrido acompañados polas agrupacións de gaitas. Ás 22.30 horas actuará Treixadura e, ás 00.30 horas, terá lugar a gran queima de fogos artificiais e o combate naval. A música continuará despois con Chocolate Disco Móbil.
Para pechar a presentación, Patricia Lojo animou á veciñanza e a todas as persoas que visiten A Pobra a saír á rúa, participar nas diferentes propostas e gozar do Carme dos Pincheiros, contribuíndo así a manter vivo o carácter propio desta celebración e unha parte moi querida da historia da vila.
